सोलापूर: भारतीय जनता पक्षाच्या प्रदेश नेतृत्वाने सोलापूर शहर व पूर्व विभागाच्या संघटनेला नवी उभारी देण्यासाठी १३ सदस्यीय विशेष कोअर कमिटीची घोषणा केली आहे. यामध्ये पक्षाचे ज्येष्ठ नेते आणि दक्षिण सोलापूरचे आमदार सुभाष (बापू) देशमुख यांचा समावेश करण्यात आला आहे.
गेल्या काही महिन्यांच्या राजकीय घडामोडींनंतर सुभाष देशमुख यांना पक्षाच्या सर्वोच्च स्थानिक निर्णय मंडळात पुन्हा मानाचे स्थान मिळाल्याने कार्यकर्त्यांमध्ये प्रचंड उत्साहाचे वातावरण निर्माण झाले आहे. आगामी सोलापूर महानगरपालिका, जिल्हा परिषद आणि पंचायत समिती निवडणुकांच्या पार्श्वभूमीवर ही समिती पक्षीय व्यूहरचना आखणार आहे.
कोअर कमिटीच्या पहिल्याच आढावा बैठकीत आमदार सुभाष देशमुख यांनी मार्गदर्शन करताना सांगितले की, "सोलापूरच्या विकासासाठी आणि सामान्य जनतेच्या विश्वासाला पात्र ठरण्यासाठी पक्षाच्या सर्व पदाधिकाऱ्यांनी व कार्यकर्त्यांनी एकदिलाने काम केले पाहिजे. केंद्र व राज्य सरकारच्या लोकोपयोगी योजना शेवटच्या घटकापर्यंत पोहोचवणे हेच आमचे प्रमुख उद्दिष्ट राहील."