सोलापूर: दक्षिण सोलापूर आणि अक्कलकोट परिसरातील शेती पिकांना वेळेवर पाणी मिळण्यासाठी सीना-भीमा उपसा सिंचन योजना आणि उजनी डावा कालव्याचे आवर्तन तात्काळ सोडण्याचे कडक निर्देश आमदार सुभाष (बापू) देशमुख यांनी जलसंपदा विभागाच्या अधिकाऱ्यांना दिले आहेत.
पाणी वाटप समितीच्या बैठकीत शेतकऱ्यांची कैफियत मांडताना देशमुखांनी स्पष्ट केले की, कालव्यांच्या शेवटच्या (टेल) टोकावरील शेतकऱ्यांपर्यंत पाण्याचा एकही थेंब पोहोचत नसल्याच्या तक्रारी खपवून घेतल्या जाणार नाहीत. कालव्यांची तातडीने दुरुस्ती करून पाण्याचा अपव्यय टाळावा, असे त्यांनी बजावले.
आमदारांच्या आक्रमक भूमिकेनंतर जलसंपदा विभागाने कालव्यात पाणी सोडण्याचे वेळापत्रक जाहीर केले असून, यामुळे हजारो शेतकऱ्यांना मोठा दिलासा मिळाला आहे.