सोलापूर: सोलापूर दक्षिण विधानसभा मतदारसंघातील अत्यंत चुरशीच्या ठरलेल्या निवडणुकीत भाजपचे ज्येष्ठ नेते व माजी सहकार मंत्री आमदार सुभाष (बापू) सुरेशचंद्र देशमुख यांनी ऐतिहासिक विजय साकारला आहे. या निवडणुकीत महायुतीकडून मैदानात उतरलेल्या सुभाष देशमुखांनी १ लाख १६ हजार ९३२ इतकी विक्रमी मते मिळवली. त्यांचे नजीकचे प्रतिस्पर्धी शिवसेनेचे (उबाठा) अमर रतिकांत पाटील यांना ३९,८०५ मते मिळाली असून, देशमुखांनी तब्बल ७७,१२७ मतांच्या प्रचंड फरकाने हा दणदणीत विजय मिळवला.
सुभाष बापू देशमुख यांचा सोलापूर दक्षिण मतदारसंघातील हा सलग तिसरा विजय असून, त्यांच्या नेतृत्वावर जनतेने पुन्हा एकदा दृढ विश्वास व्यक्त केला आहे. निकालाची घोषणा होताच सोलापूर शहर आणि दक्षिण तालुक्यात कार्यकर्त्यांनी फटाक्यांची आतषबाजी आणि गुलाल उधळत प्रचंड जल्लोष केला.
विजयी सभेत आमदार सुभाष देशमुख यांचे मनोगत: "हा विजय माझा नसून दक्षिण सोलापूरच्या जनतेचा, बळीराजाचा, माता-भगिनींचा आणि अहोरात्र कष्ट करणाऱ्या निष्ठावंत कार्यकर्त्यांचा आहे. जनतेने दिलेल्या या अभूतपूर्व जनादेशाचे ऋण मी मतदारसंघातील विकासाची गंगा अविरत वाहती ठेवून फेडेन," असा विश्वास देशमुखांनी व्यक्त केला.
या निवडणुकीत ग्रामीण भागातील सिंचन प्रकल्प, ग्रामीण रस्ते, औद्योगिकीकरण आणि शेतकरी कल्याणकारी योजना या विषयांवर देशमुखांनी घेतलेल्या ठोस भूमिकेला मतदारांनी भरभरून कौल दिला.