सोलापूर: आर्थिकदृष्ट्या दुर्बल कुटुंबांना विवाहाचा मोठा खर्च परवडत नसल्यामुळे शेतकरी व कष्टकरी वर्गावर कर्जाचा डोंगर उभा राहतो. या सामाजिक समस्येवर मात करण्यासाठी आणि सर्वधर्म समभाव जोपासण्यासाठी लोकमंगल फाऊंडेशनच्या वतीने सोलापूरमध्ये यंदाही भव्य सर्वधर्मीय सामुदायिक विवाह सोहळ्याचे शानदार आयोजन करण्यात आले.
संस्थापक अध्यक्ष सुभाष बापू देशमुख यांच्या संकल्पनेतून गेली दोन दशके अविरतपणे राबवल्या जाणाऱ्या या उपक्रमात यंदाही शेकडो जोडप्यांचा विवाह धार्मिक रीतीरिवाजांनुसार उत्साहात पार पडला. फाऊंडेशनतर्फे सहभागी प्रत्येक वधू-वराला विवाहाचे कपडे, हळदीचे पोषाख, वधूस मानाचे सुवर्ण मंगळसूत्र, जोडवे आणि संसाराला उपयुक्त पडणारा ५१ भांड्यांचा संपूर्ण संच विनामूल्य भेट देण्यात आला.
हजारो नातेवाईकांसाठी भोजन व व्यवस्था: सोहळ्यात सहभागी झालेल्या सर्व जोडप्यांच्या नातेवाईकांसाठी आणि वऱ्हाडी मंडळींसाठी चवदार महाप्रसादाची भव्य व्यवस्था करण्यात आली होती. तसेच स्त्री भ्रूणहत्या प्रतिबंध आणि कौटुंबिक आरोग्य याविषयी वधू-वरांचे समुपदेशनही करण्यात आले.
"सामुदायिक विवाह ही काळाची गरज असून यामुळे गरीब शेतकरी आत्महत्येच्या गर्तेत जाण्यापासून वाचतो. हा सोहळा म्हणजे केवळ विवाह नसून सामाजिक क्रांतीचे पाऊल आहे," असे प्रतिपादन लोकमंगल फाऊंडेशनच्या पदाधिकाऱ्यांनी केले.